ღ 小靜星 ~ k ღ

 今次同Sandy一齊上去，約左佢０７：３０響火車站等，佢仲買埋麥當奴早餐俾我食，佢問我食乜，我要左個豬柳蛋漢堡，佢又問我飲乜，我話唔飲喇，我都唔鍾意飲老麥ｄ汽水，咖啡我又唔飲嘅，點知佢買左兩個餐，因為一個飽同一個餐差好小錢就有埋嘢飲，結果佢自己飲左兩杯嘢，又唔收我錢，真係有ｄ唔好意思．入左閘見到好多人呀，好左我昨日買定火車票咋，如果去到先買就實冇票呀，上車食完嘢之後，我地兩個一齊扮豬，一開車就瞓到落車，勁好瞓呀，哈哈．去到廣州，過關時超多人，又要填健康申報表，老外仲要探體溫，比較平時用多了大概十五分鐘先過完關，出去搭的士又勁多人，去到酒店Check-in都成十一點喇！今次我地住 7 Days Inn，雖然呢間酒店乜都冇，得兩張床，一個電視同洗手間，新到連Broadband都未駁好線，但好處係好近公司，可以行路返工放工，不過房間入面連風筒都冇，要出去走廊度共用，我真係未住過呢ｄ酒店．晏晝去左仙跡岩食，佢ｄ價錢真係拍得住香港ｄ價錢，味道只係一般．夜晚好ｄ，同 June去左絕味川香食湘菜，水煮牛肉好食到不得了，食完飯去左佢住果間Twin City Apartment睇睇，真係唔錯喎，乜都有齊，仲好過我住果度，最麻煩係要搭的士返工放工，佢一個人住真係好舒適，佢都話幾正．響佢度ｓｔａｙ到成十一點先走返去 7 Days Inn瞓教，哈！ 原來7 Days Inn每晚都有一盒蒙牛牛奶送架喎，Sandy返嚟果陣已經幫我攞左上去，佢話佢唔飲奶架，所以只係攞俾我飲，嘩！好感動呀，一直以來出Trip都係我照顧ｄ同事多，今次佢照顧我，唔該晒妳呀．我返到去時見到佢響度一路食瓜子一路睇電視，沖完涼我地一直傾計傾到兩點半先瞓，我好眼瞓呀．