ღ 小靜星 ~ k ღ

第一次見Winnie，響火車上，果日係年三十晚，我第一次帶團去韶關丹霞山，好驚，重來未試過，一個人帶住二十九大二小出發，去一個未去過的地方，而且路途轉折，雖然事前已攞晒料，都係好驚，首先在紅磡乘火車去深圳，響深圳火車站午膳，期間要去搵中轉取深圳至廣州嘅火車票，餐後再搭火車去廣州，去到廣州又要停三個鐘，再去流花賓館搵中轉取廣州至韶關嘅火車票，沿途都係一個人，又要take care d團友，直到上左去韶關嘅火車，安頓好d團友後，又要再坐五個鐘火車，點解有人去d咁嘅地方玩架 ?坐火車都要坐一日，又要睇住幾時落車喎，就覺得好慘，坐左大概三個鐘頭之後，去厠所時撞到同公司的Winnie，雖然之前未見過佢，不過大家都好好傾，一路吹水吹到落車先分手，我地住唔同嘅酒店呀，到站時仲驚，成個火車站都黑黝黝，點解冇街燈嘅，條路又爛喎，已經唔識路，仲要攪ｄ咁嘅嘢，心諗唔好玩我喇，唯有跟住ｄ人群一齊行，希望前面ｄ人唔好行錯路呀，唔係就大鑊架喇，俾ｄ團友知道我唔識路，嚟緊幾日實俾人恰死，好在最後都冇行錯路，出左火車站後終於見到個Guide喇！心總算定下來，點知去到酒店，因為旺季唔夠房間，只夠安頓好晒ｄ團友，剩低我一個冇地方瞓！嘩，幾想喊呀！折騰左成日，都差不多十二點，個Guide話叫我夾埋其他公司ｄ領隊去第二度瞓！去邊喎，又唔識路！好在有一個family兩大兩小見我冇地方瞓，問我介唔介意去佢間房加張床一齊瞓，梗係唔介意喇，即刻仆到去添呀！哈哈
待續．．．．