就係今次旅程,奠下左日後我唔鐘意同人 share room.
好在得果個 family,我先唔使咁慘,夜黝黝仲要唔知道去邊度搵地方瞓咋,佢地好到呢,因為兩大兩小,有兩間房,俾我響佢地個女間房加張床瞓,咁人地係客,梗係要讓人地用厠所先喇,結果果晚攪到成兩點幾先有得瞓,第二朝又晨咁早起身 morning call d 團友,師傅教落,一定要早過酒店個morning call叫佢地起身,HeHe.
食完早餐,向住我最憎嘅丹霞山出發(去完之後就最憎),點解咁憎,因為....
咦!去到山腳又撞到Winnie,佢條友仔話唔舒服,唔上山喎.頂!早知我都唔上喇.不過果次係我第一次出團,都要上架喇!咁我跟住個Guide行,佢話山上面有d分叉路,由佢行頭我行尾, 包抄住d團友唔好俾佢地走散,如果唔係走散左就好難搵架喇,初初都好順利架,行到去山腰時,我發現唔見咁兩個,嘩!唔係喇啵!搵d咁嘅嘢嚟玩?同個Guide商量完後,佢繼續帶其他人上山頂,我就沿路番落去搵個兩個,然後再上山頂會合佢地.果兩條友都唔知貢左去邊,搵左好耐都唔見,沿路搵時又撞到其他公司d領隊(其中一個係Cross呀),唯有硬住頭皮問佢地有冇見過我果兩隻客,佢地個個都話冇見過,點解會咁架???你兩條友去左邊呀大佬!搵極都搵唔到,最後只好沿路返番上山,行行下見到果兩條茂利響條分叉路行出嚟,即刻埋去遞捕佢兩個,原來佢地話見有間廟,走左去拜佛喎,你地就過癮喇,累到我周圍咁搵你.
上左三份之二嘅山路後,去到一個要打側身僅僅夠一個人穿過嘅通道,過左去之後,嘿!好戲在後頭,見到一條好窄兼成九十度角斜嘅石級,當拾級而上時兩旁只有條鐵做嘅扶手,都有成二三百級石級,重要上?唔好啦掛?d團友話都嚟到呢度咯,梗係要上喇,天呀!點解我上左嚟架?佢地個個叫我一齊上去,我又唔衰得,咪同佢地一齊上囉,上到去望住 下面條河同對面山d風景,佢地個個都話好靚好值得上嚟喎,而我就只有一個感覺,就係想喊!做乜第一次帶團就俾團咁難啃嘅我喎!都係Winnie醒,咋死唔上嚟!
哈,落山時仲甘,由山頂行果條九十度角斜嘅石級落番去,嚇到腳都震埋,兩隻手捉到個扶手實一實,幾驚會碌落去呀!我終於明白d人話上山容易落山難嘅道理喇!幾經辛苦先落到山下面,一早起身行山行左成五個鐘,當年係我有生以來最辛苦嘅一次,當架車緩緩駛離丹霞山時,我回頭望住個山響心入面講,我以後都唔再嚟呢度呀!
待續....

arrow
arrow
    全站熱搜

    Mandy9013 發表在 痞客邦 留言(0) 人氣()