ღ 小靜星 ~ k ღ

今早約左PCCW去佢地個廣州個center參觀，佢地好好人又熱情呀，問佢乜都肯講，究竟佢地知唔知乜嘢係商業秘密架？我真係有ｄ擔心第日人地問佢，佢都講晒比人知我地公司ｄ要求，哈哈！糾纏左一個上午，準備離開時，突然間橫風橫雨，有遮都冇用，恐怕一出去就會全身濕晒，我地都係決定唔走住，食埋 Lunch 再睇定ｄ先算！去左同大厦入面一間叫港式咖啡館食飯，好細間，得五六張枱，但環境唔錯，居高臨下一路望住雨景食 Lunch，幾好 feel ，不過就真係港式價錢，以廣州嘅生活指數來講，算係高消費，所以 Lunch Time 都坐唔滿．問侍應生食乜最快，佢話食 set lunch 喇，好！就叫呢個C餐，黑椒牛仔骨跟飯，但我唔想食飯，問佢可唔可以改意粉或薯菜，佢話唔得架喎，要整過好麻煩同要等好耐喎，哎呀！乜咁死蠢架，A餐咪就係跟意粉囉，邊使整過架，唉！講極都唔明，都係算把喇，怕左佢呀．哈！睇唔出件黑椒牛仔骨又幾好食喎，係港式味道，人民幣二十八蚊連涷飲，食得過！我同事就叫左個唔知咩雜菌炒飯再加涷飲，炒飯都好好食，夠乾身又唔多油，不過就真係好耐同埋貴ｄ，佢加埋涷飲要成人民幣五十八蚊，仲要我食飽佢都未有得食．食完 Lunch就離開返公司做嘢，好在細雨左好多，上左的士都係隻鞋濕左小小．下晝響公司都好忙，好多嘢要 discuss同決定，攪到好夜先收工