ღ 小靜星 ~ k ღ

Boxing Day 終於的起心肝去睇醫生，d 藥好難食呀，醫生又話唔眼瞓嘅，食左之後仲瘟瘟飩飩添，瞓醒又口腫面腫，好似俾人打左兩搥咁，醜樣指數爆燈，結果成日厘埋響屋企扮豬，病左又肥左，點解咁架？今朝一早又番左公司，由二零零九年一月一日開始，我地取消長短週喇，今日係做最後一次義工，返到去不出所料，十足十戰場咁，成張枱面都係石仔同沙塵，死人 Admin 又話我個位唔使整無嘢架，叫我廿四號放工唔使冚住張枱同張櫈，下次真係唔信佢呀。夜晚係同事Winnie結婚，去左黃竹坑珍寶擺喜酒，舊地重遊，真係感慨萬千，昔日嘅畫面又再浮現腦海中！今晚見番一 d已經走左嘅舊同事，亦見到我最憎果個人，唔係好想同佢講嘢，不過點都要寒暄兩句嘅，仲同佢影左張相，我好想同佢講：死八婆我好憎妳呀！睇番今晚 d 相，見到佢地個個咁肥美，先至發覺原來我好瘦架咋，有張相仲瘦到現晒胸骨添！返到屋企都十二點幾喇，成晚都咳，咳到半夜要起身食藥，點解食左藥都係咁咳架，咳到成晚瞓都瞓唔到，唔好再咳喇，得唔得呀？