ღ 小靜星 ~ k ღ

嚟緊公司要裝修，今日返公司做完嘢，就開始執嘢，成個部門咁多嘢，都唔知放去邊度好？好煩！已經丟左好多，但仲有好多唔丟得嘅，headset 都成箱，boxfile 又幾箱，全部都冇地方擺呀

今日難得放假一天，一早同屋企人去飲茶，嘩！平日都咁多人嘅？真係好耐都未試過平日去酒樓喇，點解d人唔使返工嘅？飲完茶之後去左尖沙咀 shopping，去到海港城仲誇張，簡直係人山人海，又話金融海嘯經濟低迷，每間名店都要排隊入去，其實我最想買個 LV，所以就走去排LV先，等左大概十五分鐘就入到去，咦....都冇新款，d 餃子袋又咁女人，唔係好啱心水，不過d 國內人就好誇張，唔理乜嘢款都掃一餐，好多袋都冇貨添呀，我行左一陣就走喇，再去隔鄰的Gucci 排隊，都係等左一陣就入到去，其實我唔係咁鐘意Gucci ，佢d quality 麻麻地唔夠 LV 好，不過都睇啱左個書包型，用嚟袋我本 notebook 都幾好，結果就買左佢返屋企 hehe，等付款的時候，見到左右隔離全部都是講普通話的國內同胞，佢地真係好誇張架，響LV 掃完貨，再過嚟 Gucci 掃貨，買袋買到好似去街市買棵菜咁，完全好似唔使錢咁，又快又狠，我真係甘拜下風呀。買完袋又去左買衫，買左件今年最流行有帽同入面有毛毛嘅冷外套，仲買左一件 GORE-TEX 防風防水風褸，諗住下星期帶去廣州著 最後仲買左對三吋高跟鞋添，唔....今日須然用左好多錢，不過 shopping 真係好開心喎。

寒冬已來臨，最唔想見到嘅事終於都要發生，大家要開始一齊瘦身lu。點解有d人仲係咁唔珍惜，樣樣都唔理，好似周圍發生緊嘅事都唔關佢地事咁，我唔相信您地可以置身事外囉，唔想俾人叮就醒醒定定喇，咁嘅時勢仲出錯率咁高，真係無人幫到您地架。

這個星期天氣好乾燥，攪到我又皮膚敏感，起晒紅點，好痕呀 抓到兩條手臂同小腿損晒喇！

今日好開心呀，一早同屋企人去左大嶼山＋大澳一日遊，坐左個半鐘頭巴士先到大嶼山，落車時覺得都好凍下，好在我早有準備，知道新界比市區溫度要低些，穿了羽絨背心加外套（其實Grandma都係著冷衫咋），哈哈響我部傻瓜機下的天壇大佛都影得不錯，去完天壇大佛，我地又去左寶蓮寺，見到寶蓮寺入面有個大雄寶殿，令我即時諗起多啦A夢，hehe。中午在寶蓮寺內食午餐，d 豆腐花好滑呀，又不太甜，都幾好食。之後我地又出發去大澳，本來我對大澳冇乜嘢期望的，在我印象中它只不過是一個水鄉吧！去到後環顧四周，全都是擺買土產的店舖，不外是鹹魚、蝦膏、蝦醬和魷魚乾等等海味，果然沒啥特別！沿途不斷有船家在推銷遊船河，說有緣的話可以看到中華白海豚，本來我們也沒興趣的，而且這種天氣又怎會看到白海豚o丫，但既來之則安之，而且價錢又不貴，只是港幣２０元一位，我們便姑且一試，上了快艇後，我和Grandma 坐在最後的位置上，沒精打采的四處看看那些建在水上的房屋，其實小學時的課本已介紹過這些房屋，我根本就提不起勁看，兜了一圈後當快艇駛離這些房屋出公海時，嘩！原來好戲在後頭，快艇即時以高速飛馳，我即時跑了去船頭坐，快艇不斷被浪拋起，我和其他人一直在尖叫，將心內的抑鬱通通都叫晒出來，須然我不暗水性，但也極愛這種乘風破浪的感覺，真係好好玩及不枉此行。回程時，我們選擇了坐車到梅窩碼頭再乘船回香港，一上車睡魔又作怪，即時又瞓左，一直瞓到落車，去到碼頭時踫巧有快船，只需半小時便回到香港，落船後去麥當奴買了個和風滋味蝦堡食，可能肚餓的關係，覺得好好味呀！食完再去 shopping 喎，結果又買左對 acupuncture 黑底螢光綠 logo 的波鞋，今次我冇貪靚唔買有水晶嘅波鞋喇！　

咦....琴日買果隻Mon，真係唔得架，個喇叭 d 聲好拆，完全聽唔到，結果今日又要拎去換，個老闆話而家 d Mon個喇叭係咁架喎，不過我對BENQ 呢個牌子已經冇晒信心，都係補左兩嚿換左隻20吋ACER Mon，越換越大隻，霸晒張枱 d 位嘩！ 今日仲要係電腦節，成個黃金商場迫到插針都插唔入，又話金融海嘯，經濟唔好，都仲有咁多人買嘢，見到好多人都買 BENQ 隻 Mon，我嘅決定係咪錯呢？不過 BENQ 隻 Mon 真係幾多缺點，只有一個設定值，有 d 嘢佢都無法顯示到，ACER就冇呢個問題，下次都係唔好貪平，攪到拎嚟拎去鬼死咁辛苦，換完 Mon 順手買埋支 8GB 手指，然後去左食好出名的劉森記蝦子雲吞牛筋麵 ，果然名不虛傳，好好食不過好貴，佢 d 雲吞真係有以前細個爸爸帶我地去食過的味道，而家好難搵得到，果然長龍同貴得有道理！

最近好多嘢都壞晒，都唔知有冇攪錯，無端端隻Mon又壞左架，今日去買過隻19吋 16：9 Mon，特價盛惠八嚿，再買多隻 notebook 用嘅 USB Mouse，真係話咁快又唔見在左壹仟喇，本來想買多支 8GB 手指，又要嚿幾，諗諗下都係唔買住喇，遲 d 先喇，今個月已經出現財赤，使錢的速度遠遠勝過我搵錢速度，再咁落去真係唔掂，要慳 d 使先得。不過又好想買個 LV 喎，今年都未買過禮物送比自己呀，唔知農曆新年前可唔可以買到呢？

月色映在我的臉龐
今夜適合寂寞陪伴
說過的話繞在我腦海不停的轉

有些事總不能重來

昨天沒有回公司，今天返去做了半天義工，諗住做完 report 就走，已經無開電話架喇，但都係做唔到嘢，一個二個係都要嚟攪我，您地當睇唔到我得唔得架？我不在公司時，您地咪又係咁做，點解係都要煩下我先安樂唧？結果攪到一點幾我都係做唔到 report，唉！算把喇，都係抄 d 數字返屋企做。本來今日下午約了去哥哥度整電腦，不過哥哥臨時有嘢做，又整不到部機，煩死人喇！>.<

今年Ocean Terminal d 聖誕燈飾好特別好靚，在上樓梯位的天花吊滿了一排排不同形狀的時鐘，好像進入了多拉A夢的時光隧道，好有童話 feel好浪漫，還有那列小火車，須然沒什麼特別華麗裝飾，只簡簡單單圍滿了七彩的燈泡，但很有小鎮的風貌，好喜歡置身其中的感覺。好可惜今早上班時太怱忙，忘記了帶相機，未能把時光隧道拍下來，希望下星期能抽空再去拍下照片 >.< 今年的聖誕氣氛真的差了很多，由 Ocean Terminal 至 Harbour City 的商場，人流明顯比往年小了很多，簡直可用疏落來形容，商店內都不見有顧客，行人都是在作 window shopping，這次我們受金融海嘯的影響可真不小! 好希望大家都能夠儘快走出陰霾，恢復昔日的光彩喇。

今日勁多嘢做, 忙到簡直分身乏術, 又要睇 new system demo，又要聽電話，customer service 又不停搵我，問 d complaint 點 settle， 佢個個 case 都話 settle 不了，問我點算，即係咁妳就 settle 唔到 d case，係要我先 settle 到嘅，我覺得如果全部 case 都我做番，係咪應該我出埋妳份糧呢，公司使鬼請兩個人嚟做 customer service 喎！New system 個 demo 仲離譜，我想睇嘅全部 show 唔到比我睇，全部都話要 tailor made，我夠知喇，就係想您做好 present 比我睇，點知您地都未準備好，就上嚟o徒晒我 d 時間

今晚同廣州來的同事去了元碌食壽司，香港的壽司真是好食過廣州嘅壽司多多聲，我食左好多呀，聽日又要減肥喇！食完壽司陪佢行左一陣街，然後送佢番酒店，佢條友又話認得路，結果係太子地鐵站附近兜來兜去，都搵唔到佢住果間酒店，最後要行番落地鐵站，去番 D 出口，先搵到間酒店，咁叫做識路，真係俾佢激死！佢昨日來時，已經唔識路攪左好耐，唔識咪唔識囉，咪懶醒先得o架！本來我叫了 admin 安排人去火車站接佢，佢又懶醒話識路，唔使人接，知道點去酒店喎，結果佢話搭完地鐵，拎住d行李行了四十五分鐘兼去錯了酒店，最後又係要派人去接佢，浪費左半天時間，唔識唔使扮勁嘅，老實d好喎。查實妳唔只唔識，仲有d蠢添囉，又見我去廣州要人接送，我咪又係自己去酒店 check-in 再自己去 office，走時又係自己去火車站，邊有蕩失路架！

唉，屋企部電腦又中左毒，連網都上唔到，有冇攪錯呀？上個禮拜六先拎去比哥哥 formal 完，而家又中毒，放病毒的人真的很討厭！今年已經俾部電腦玩死我，由年頭整到年尾，一放假就去整機，抬住部機走嚟走去，唔好再玩我喇！